Ti Cuntu. Racconti in Dialetto di Tanino Riccobene 

LI MACCARRUNA ( Seconda Parte )

Vannuzzu tuccannu tuccannu a la genti stinnicchiati cu ddra grampata di maccarruna e dru sucu ca ci sculava arriva a tuccari lu darridi di la mamma di la zita.

Allura quannu ci tuccava lu darridi a la mamma di la zita pinsava di essiri arrivatu di so frati Sciaveriu chiddru ca avia li gargiulara grussi. Infatti Vannuzzu pinsava ca lu darridi di la mamma di la zita ieranu li gargiulara di lu frati. E cumincia a bisbigliari a lu darridi di la mamma di la zita: "Sciavè, Sciavè...iiu sugnu Vannuzzu, te ca ti purtaiu na grampata di maccarruna".

"Sciavè, Sciavè...iu sugnu Vannuzzu, te lu frati mangiati sti maccarruna" Cu cia via rispunniri lu darridi di chiddra? E dru sucu ca ci sculava e iva a finiri ncapu lu darridi di la mamma di la zita. Iammu ca iera d'estati cu lu callu e scummigliata ca iera a la mamma di la zita ci veni di fari (scusati) un piditu. Ora stu piditu nun si nni ji cantannu si nni ji nfumu..fiuuuh...fiuuuh.

Vannuzzu si gunchià li sacchetti ca si stancà cu ddri maccarruna manu e dissi "Chi sciusci Sciavè, chi sciusci, s'allifriddaru"

Si stancà piglià dra grampata di maccarruna e ci li ghittà ncapu lu darridi di la mamma di la zita ca iera scummigliatiu.

La mamma di la zita nun si sdriviglià, tantu iera stanca e durmiva a culu a ponti cu li maccarruna dra ncapu e lu sucu ca ci sculava.

Vannuzzu, ca si gunchià li sacchetti, ie circà la giarra cu l'acqua ddra intra pi lavarisi li manu e nun farisi scupriri. Stavota nzirtà la direzioni e trasi li manu intra la vucca di la giarra ca iera s...tritta. Però li manu a lu trasiri trasiru ma a lu nesciri nun putivanu nesciri. Tantu si misi a cummattiri ca la solleva ndra ariu fina ca niscì li manu. Ma la giarra volà e ghiè finì ntesta a la mamma di la zita ca si sdriviglià e si misi a gridari "Auiutu, aiutu" Tutti si susiru e la truvaru cu lu sangu ntesta e lu darridi chinu di sucu e maccarruna. Lu Vannuzzu nun nappi cummu scusarisi...

Tanino Riccobene