Ti Cuntu....
LA DOTA (la dote) ( Tratto dal libro Chistu Riesi)
a) Cumpari Turiddru,biddru e prisintùsu,
pinsastivu cchi dota avò purtari lu carusu?
Ma figlia, iè beddra arrizzittàta
Si la vidi, iè ‘na bona margunàta;
‘Sta figlia iè di pregiu e oru culatu,
perciò, nun si po’ pigliari a un scarcinàtu!
b)Se’ tùmmina di terra j ci dugnu,
ma a lu “Bannùtu nò! pirchì iè cugnu.
Lu voli chiddru di lu “Muliùni”?
a)Nun s’avò siddrià, c’è lu vaddrùni!
Pirchì nun ci lu duna a “Mariànu”
ca iè vicinu e veni cchiu a la manu?
Oppuri, ci lu duna a la “Cuntìssa”,
vi pari ca truvastivu lu fissa?
b)Sintiti , cci lu dugnu a”Guaddrarà”
ca iè cchiu migliu e m’avò ringrazià!
a)La casa, ci l’addota a’stu picciuttu?
macari chiddra ca c’è a lu “Figuttu”!
b)cumpari miu ,pulitu e sapuritu
circàti sulu dota o a lu zitu?
Chiuttustu, chi cci dati a ‘sta carusa
Ca dici ca iè ricca e spicchialùsa?
a)Ci dugnu tanta beddra biancherìa
la cascia iè china di tappezzerìa,
linzola a sia a sia a metràggiu
e la cutra a ‘ntagliu, chiddra, di lu “nguàggiu”,
Ci dugnu mataràzza ccu lu crinu
oppuri d’arfa e cci lu inchiu chinu;
e poi cci iùngiu ‘n atra cutra fina
o pritènni ca cci jè ddà la cuttunìna?
E sparti un mulu grussu e un sceccu zuppu,
ci serbi, cridìssi a mia,”urbu di n’ucchiu “!
b)Accussì vi ni niscìstivu di nittu?
La casa cci avò ddà ca l’arrizzìttu!
E la terra, nun ci la duna a la “ ‘Mmiata”
o ma vo fari fa ‘nna vanniàta?
E la lignàmi bona, nun ci l’avò fari?
Di sta casa,nun si nna na’ prigàri?
Mi pari ca j mi vugliu svinnignàri
Ppi ‘sti du carùsi ca ‘mma maritari.
Ppi ma figliu ma jè spugliatu
C’è nna mitura d’oru, li terri e lu spisato,
Staiu parrannu cumu n’omu saggiu,
si nun m’ascùta scunchiùiu lu zitaggiu!
Stu fìcatu mi l’haiu fattu spattu,
nun ci l’accurdu e strazzu lu cuntrattu!
Parraru ‘nna iurnata e ‘nna nuttata,
lu messaggiri cci accurdà, poi, la sunàta,
Li ziti, però, ora su cuntenti
ca li famigli nun s’ammìscanu ppi nenti
Si iru lestu ,‘nsimii, a maritàri
Li doti, si iru a fìciru ammazzàri!
PIERA CUTAIA
Commenti
Posta un commento