Aneddoti  sulla seconda guerra mondiale a Riesi

Monologo tratto dal recital “Mumenti di famiglia” del 2003 di Tanino Riccobene 

NONNO – E chi haiu passatu! E la guerra, lu sacciu iu chi passaiu! Viditi si parra di guerra a lu 2003 a minzu a tantu benessiri ca c’è! Mai siasi na cosa di chissa! Na guerra a sti tempa nun ci vugliu mancu pinsari!
Iu ca la passaiu vi lu puzzu diri chi guai e che bruttu! Pinsati ca durante la 2^ guerra mondiale (si alza e racconta insieme alla nonna) lu cumpari Turiddru sintì ca avianu a bombardari lu paisi e allura nni vinni ntesta di scappari di Riesi ppi ghiri ncampagna tutti dui li famigli, la nostra e chiddra di ma cumpari Turiddru.
Ddrà ncampagna, iu, tannu, c’havia na casuzza picciddra e rustica cu lu pagliuccu.
Mentri caminavamu, strata strata, chiù lestu ca putivamu, nni vinni mbacciu na pattuglia di surdati tedeschi.
“Mamma pirsi simmu!” – pinsaiu – “Sopiddra chi vunu?”NIPOTE – E chi vulivanu nonno?
NONNO – vulivanu n’informazioni, mi dissiru “Dove essere le schette?”
A iu e ma cumpari nni sintimmu muriri, pirchì aviamu li figli schetti! Ccà, iu pinsaiu, nni facimmu ammazzari!
“Dove essere le schette? “- nni dissi gridannu lu tedesco!
Ma cumpari Turiddru ci dissi “Pigliativia nuatri chiutustu e sarbati a li nostri figli schetti!”
“Dove essere le schette?... Strada…Bivio…”
Mamma chi suspiru di sollievo tirammu!
Lu Signuri vosi ca dopu ca ci ficimu capiri, a via di signali, unna iera lu biviu di li schetti, cuntinuammu a caminari fina ca iungimmu ncampagna di ddra casuzza.
NONNA – E chi vua, lu niputi, tanti genti ammunziddrati dda tecchia di casuzza china di pagliuccu, figurati cummu ieramu misi!
Si sintivanu l’apparecchi ca vulavanu!
Ma matri, ca tannu iera viva, scantannusi ca cuminciavanu a bombardari, faciva ppi tò matri “Mintitila sutta a lu tavulinu a la carusa, accussì si bombardanu almenu si salva!”
Chi ieranu ngenui l’antichi! Ma si bombardavano nun l’acchiappavanu a lu stessu, anchi sutta a lu tavulinu?
E accussì nni spagnavamu a nesciri fora di la casa.NONNO – Immu a ma cumpari Turiddru, ca cci vinni di fari la pipì. Ddrà nun c’era tannu mancu lu bagnu e mancu si putiva nesciri fora!
Iddru ca iè finu di lu so fari, tuttu educatu mi dissi “Cumpà, cummu a iè fari, ma iè trattinutu nun ci la fazzu cchiù! Ci sono le donne, cumpari, cummu fazzu? Anchi ca mi giru sintinu tutti cosi!”
Allura iu cci dissi “Cumpà, si vutassi di ssu muru e la facissi, ca iu mi mintu a fari rumuri scrapisannu ccu li pidi lu pagliuccu ca c’è nterra”
Accussì si cunvincì! Ma stava murinnu tannu e cumincià a fari la pipì e mi faciva “Continui compare, continui”
E iu continuava a scrapisari paglia.
Ma quantu pipì ca fici! Pariva un rubinettu apirtu. Sulu ca la puzza ddrà dintra…
Nsumma a la fini lu signuri vosi c' anni sarbammu.