A giugnu cuminciaru a la marina,
e ghieru a travaglia' li mititura;
si misiru a li spaddi 'na sacchina
cu 'na pignata e quattru muccatura.
Ci ieri mititura riisani,
di Summatinu e di Cartanisetta,
ci ieru quasi tutti li viddani,
puru di Enna e di Calascibetta.
E La matina prestu ddà a la chiazza
li capurala vinniru a taliari:
ittavanu vilenu, no sputazza,
parivra ca si ni ivanu a spagliari.
“Tu vieni, tu si' buonu a travagliari,
tu no, tu nun si' buonu, non ti vuogliu;
vi dugnu menza lira e lu mangiari:
quattru sarduzzi cu l'acitu e l'uogliu».
Ristaru scunsulati 'ssa matina
Li genti,ca nun àppiru travagliu,
ma fina ca lassaru la marina
si chiusiru lavucca cu u' stuppagliu.
E l'atrí cuminciaru a travagliari
mentri lu suli dìvintava fortì,
ora lu callu li facìa sudari,
e tutti bistimmiavanu la sorti.
Scruscivanu li rini ndi li spaddi,
li vrazza ci písavanu un cantaru:
forsi iera mieglìu 'n guerra cu li baddi
ca no murìri pì 'ssu pani amaru.
Ddi spichi su' chìù duri di 'na mazza,
e di lu primu suli 'nsina a sira
vulavanu li faci, e ndí li vrazza
c'era la morti pi dda menza lira.
La sìra fìnarmenti cu lu scuru
turnavanu 'n paisi pi mangiari
ddi quattru sardi cu lu pani duru,
e poi si ni ivanu a curcari.
Mintivanu la giacca pi chiumazzu,
lu tascu 'n capu I'uócchi pi difisa,
la terra ci facìa di matarazzu,
e pi lìnzuolu c'era la cammìsa.
E lu paisi divintava un liettu,
e li banchini ieranu divani,
e cu' parìa padduottula e cu' friettu,
durmivanu accussi, cuomu !i cani;
stringivanu li vrazza ndi lu piettu,
stinnivanu li gammi luonghi 'n terra,
lu maritatu 'n faccia di lu schiettu
runculiava ca parìa'na serra.
E lu 'nnumanu, sempri a primu suli,
accuminciava arrieri dda canzuna:
abbiàti all'antu 'n fila cuomu muli
ivanu tutti appriessu a la spurtuna.
Davanu mussu tutta la iurnata
pirchì a la festa di la «Bedda Matri»
putìanu fari china la pignata....
'ccussì li picciliddi ieranu satri.
Commenti
Posta un commento