A RIESI

TU JA' LA TESTA...

(dialogo MOGLIE-MARITO)

di Tanino Riccobene 

- Cessu, cessu, cessu…sugnu sbalurduta lu maritu…la sintutu parrari ad Alberto Angela?

- E cu jè stu LibbIrtuzzu o Angilina?

- Certu ca si propriu scuru, jà sempri la testa firrigna! Alberto Angela intanto jè omu e poi spunta sempri ntelevisione e ghiè figliu di Piero Angela.

- Mmi! Ma quantu nni sa! Quantu si …cummu si dici…cugliuta.

- Sicuramenti vulivatu diri colta… si dice colta…ppi nun si dirrà nun stavatu dicinnu na parola brutta …unna ti vinni ssu cugliuta? Di drucu si vidi cummu si tu…Alberto Angela fa trasmissioni culturali e javi un tumminu di ciaraviddru…tu, lu maritu, jà la testa di sceccu…jà la testa di vainascu…jà la testa di mastruminicu…jà la testa cruzzuta…jà la testa cu un cervellu di gaddrina…jà la testa di purcu…

- Basta cchiù…ora mi sta offinninnu assai…ti mintisti…jà…jà…jà…vidica ji sugnu riisanu, nun sugnu tedescu cu ssu JA’… JA’… JA’ ca mi dì arrota cuntinua! 

Sugnu RIISANU…babbigna tu!